Ֆրանկոֆոնիային նվիրված միջոցառում

05 մայիսի, 2019

ՀՀ՝ Ֆրանկոֆոնիայի գագաթաժողովի նախագահության շրջանակներում Սոֆիայում կազմակերպված միջոցառման վերաբերյալ

Հայաստանի՝ Ֆրանկոֆոնիայի գագաթաժողովի նախագահության շրջանակներում Բուլղարիայում ՀՀ դեսպանությունը մայիսի 27-ին Սոֆիայի Ֆրանսիական ինստիտուտում կազմակերպեց «Տեղեկատվական տեխնոլոգիաների ոլորտում Ֆրանկոֆոնիայի անդամ երկրների միջև համագործակցության հեռանկարները» խորագրով տեղեկատվական-մշակութային միջոցառումը:

Միջոցառմանը ներկա էին ԲՀ նախագահի աշխատակազմի, ԲՀ փոխվարչապետի գրասենյակի և ԲՀ ԱԳՆ բարձրաստիճան պաշտոնյաներ, Սոֆիայում հավատարմագրված ֆրանկոֆոն երկրների դեսպաններ և դիվանագետներ, գիտնականներ և հասարակական գործիչներ, լրագրողներ, ՏՏ ընկերությունների փորձագետներ և գործարարներ: Ներկա էին նաև Բուլղարիայի հայկական կազմակերպությունների ղեկավարներ ու ներկայացուցիչներ:

ԲՀ-ում ՀՀ դեսպան Արմեն Սարգսյանը հանդես եկավ համապարփակ ներկայացմամբ՝ ներկաներին տեղեկացնելով ՖՄԿ-ում նախագահությունը ստանձնելուց ի վեր Հայաստանի կողմից իրականացված հիմնական միջոցառումների, տեղի ունեցած կարևոր զարգացումների մասին: Դեսպանը ներկայացրեց նաև ընթացիկ տարվա երկրորդ կեսին Հայաստանում ծրագրված ՏՏ ոլորտի հիմնական միջոցառումները՝ կոչ անելով ակտիվ մասնակցություն ցուցաբերել դրանցում:

Միջոցառման ընթացքում ցուցադրվեցին Հայաստանը ներկայացնող, ինչպես նաև Երևանի Թումո կենտրոնի մասին պատմող տեսաֆիլմեր:

Այնուհետև երաժշտական կատարումներով հանդես եկան բուլղարահայ ճանաչված երգիչ և երգահան Հայկաշոտ Աղասյանը և իր ղեկավարած մանկական երգչախումբը, բուլղարահայ երգչուհի Ալիս Ինջեյանը, Երևանից ժամանած ջազային կատարողներ Նառա Առաքելյանը և Երվանդ Մարգարյանը: Միջոցառման վերջում կազմակերպվեց ընդունելություն, որի ընթացքում ներկաները հնարավորություն ունեցան համտեսելու հայկական գինին և կոնյակը: Միջոցառմանն իր ակտիվ մասնակցությունն ու աջակցությունը բերեց ՀԲԸՄ Սոֆիայի մասնաճյուղը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր