ԲՈՒԼՂԱՐԻԱՅԻ ՇՈՒՄԵՆ ՔԱՂԱՔՈՒՄ ՆՇՎԵՑ ԳԵՆԵՐԱԼ ՄԱԴԱԹՈՎԻ ՀՈԲԵԼՅԱՆԸ

31 մայիսի, 2012

Ս.թ. մայիսի 31-ին Բուլղարիայի Հանրապետության Շումեն քաղաքի կենտրոնական զբոսայգում տեղի ունեցավ 1828-1829թթ. ռուս-թուրքական պատերազմի մասնակից գեներալ-լեյտենանտ Մադաթովի ծննդյան 230-րդ տարեդարձին նվիրված հանդիսություն, որը կազմակերպել էին Շումենի քաղաքապետարանը, «Դոբրի Վոյնիկով-1856» գրադարանը և տեղի հայ համայնքը: Միջոցառմանը ներկա էին ԲՀ-ում ՀՀ դեսպան Արսեն Սհոյանը, Հայաստանի Առաքելական Սուրբ եկեղեցու Բուլղարիայի թեմի առաջնորդական տեղապահ Տ. Աբգար վարդապետ Հովակիմյանը, Բուլղարիայի Թեմական խորհրդի նախագահ Ռուբեն Գրիգորյանը, Վառնայում ՀՀ պատվո հյուպատոս Սարգիս Սարգիզովը, Վառնայի և Վելիկոպրեսլավի սրբազան Կիրիլը, Շումենի և Վառնայի հայ համայնքի, ինչպես նաև բուլղար հասարակայնության ներկայացուցիչներ, լրատվամիջոցներ:
Հանդիսությանը ներկա էր Մոսկվայից ժամանած բարերար Գևորգ Քեսոյանը, որը ֆինանսավորել է գեներալ Մադաթովի կիսանդրին քանդակելու և զբոսայգում տեղադրելու աշխատանքները: Մեծ հերոսի հիշատակը նշելու կապակցությամբ նա Սուրբ Գևորգ զորավարի սրբապատկեր նվիրեց քաղաքին:
Ծաղկեպսակներ մատուցվեցին ԲՀ-ում ՀՀ դեսպանության, Վառնայում ՀՀ պատվո հյուպատոսության, հայ առաքելական եկեղեցու Բուլղարիայի թեմական խորհրդի, Շումենի քաղաքապետարանի և մարզպետարանի, «Դոբրի Վոյնիկով-1856» գրադարանի, Շումենի հայ համայնքի և եկեղեցական վարչության կողմից, ծաղկեփնջեր երախտավոր քաղաքացիներից:
Հանդիսությունից հետո քաղաքապետ Կրասիմիր Կոստովի տված պաշտոնական ճաշի ժամանակ դեսպան Սհոյանի և քաղաքապետ Կոստովի միջև ձեռք բերվեց պայմանավորվածություն այսուհետ 1828-1829թթ. ռուս-թուրքական պատերազմի կապակցությամբ Շումենում կազմակերպվող միջոցառումների ծրագրում ընդգրկել հանդիսություններ նաև գեներալ Մադաթովի կիսանդրու առջև՝ հարգելով նրա ավանդը քաղաքի ազատագրման գործում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր