Բուլղարիայում ՀՀ դեսպան Արսեն Սհոյանի հանդիպումը Բուլղարիայի Ազգային Ժողովի նախագահ տիկին Ցեցկա Ցաչևայի հետ

15 հոկտեմբերի, 2012

Ս.թ. հոկտեմբերի 15-ին Բուլղարիայի Ազգային Ժողովում տեղի ունեցավ հանդիպում ՀՀ դեսպան Արսեն Սհոյանի և Բուլղարիայի Ազգային Ժողովի նախագահ տիկին Ցեցկա Ցաչևայի միջև:
ՀՀ դեսպան Արսեն Սհոյանը փոխանցեց ՀՀ ԱԺ նախագահ Հովիկ Աբրահամյանի նամակը ուղղված տիկին Ցաչևային և կից ՀՀ Ազգային Ժողովի հայտարարությունը` 2004 թվականի փետրվարին Բուդապեշտում ՆԱՏՕ-ի դասընթացների ժամանակ հայ սպա Գուրգեն Մարգարյանին սպանած հանցագործին Հունգարիայի իշխանությունների կողմից Ադրբեջանին փոխանցելու եւ Ադրբեջանի նախագահի կողմից վերջինիս ներում շնորհելու կապակցությամբ:
ԲՀ Ազգային Ժողովի նախագահը իր հերթին հայտնեց, որ լավատեղյակ է խնդրին և, որ Բուլղարիայի իշխանությունների վերաբերմունքը համահունչ է Եվրամիության արտաքին հարաբերությունների եւ անվտանգության քաղաքականության հարցերով գերագույն հանձնակատար Քեթրին Էշտոնի հայտնած դիրքորոշմանը:
Հանդիպման ընթացքում ՀՀ դեսպանը ներկայացրեց Լեռնային Ղարաբաղի հակամարտության կարգավորման վերջին զարգացումները և անդրադարձավ Ղարաբաղում վերջերս կայացած նախագահական ընտրություններին:
Բուլղարիայի Ազգային ժողովի նախագահը ողջունեց Ղարաբաղյան խնդրի կարգավորմանը բանակցային ճանապարհով հասնելու Հայաստանի ջանքերը և նշեց, որ Բուլղարիան մշտապես կողմ է եղել հարցի խաղաղ կարգավորմանը:

Բուլղարիայի Ազգային Ժողովի նախագահը բարձր գնահատեց Բուլղարիայում հայ համայնքի դերակատարությունը, և հայտնեց իր պատրաստակամությունը` մշտապես աջակցել բուլղարահայերին իրենց բազմաթիվ նախաձեռնություններում:

Տիկին Ցաչևան վերահաստատեց ՀՀ ԱԺ նախագահ Հովիկ Աբրահամյանի Բուլղարիա այցելելու հրավերը` իրեն հարմար ժամանակաշրջանում, նշելով որ այցը լրացուցիչ խթան կհանդիսանա բարձր կապերի խորացմանն ու զարգացմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր