Հայոց ցեղասպանության 100-րդ տարելիցի հիշատակի արարողություն Սոֆիայի սինագոգում և եկեղեցիներում

21 ապրիլի, 2015

Ապրիլի 18-ին Բուլղարիայում ՀՀ դեսպանության և կրոնական համայնքների Ազգային խորհրդի նախաձեռնությամբ, Սոֆիայի սինագոգում, որը ամենամեծն է Բալկաններում տեղի ունեցավ Հայոց ցեղասպանության անմեղ զոհերի 100-րդ տարելիցի հիշատակին նվիրված ոգեկոչման արարողություն, որը անցկացրեց սինագոգի րաբբի Յոսեֆ Սոլոմոնը:
Շնորհակալական խոսքով հանդես եկավ ՀՀ դեսպան Արսեն Սհոյանը, որն իր երախտագիտությունը հայտնեց հրեա ժողովրդին` անվանի զավակներ Հենրի Մորգենթաուի, Ռաֆաել Լեմկինի և Ֆրանց Վերֆելի համար, որոնց ներդրումը հայոց ցեղասպանության ճանաչման գործում անգնահատելի է:Դեսպան Սհոյանը ցեղասպանություն և հոլոկոստ վերապրած հայ և հրեա ժողովուրդներին մաղթեց ապրել և արարել միասնաբար:
Արարողությանը ներկա էին Բուլղարիայի Հայ Առաքելական եկեղեցու ներկայացուցիչները, Բուլղար Ուղղափար և Կաթոլիկ եկեղեցիների, ինչպես նաև Միացյալ ավետարանական, Հրեական կենտրոնական հոգևոր խորհրդի ներկայացուցիչները, հայկական և հրեական համայնքի անդամներ:
Ապրիլի 19-ին Սոֆիայում “Սուրբ Սոֆիա” Բուլղար ուղղափար և Ավետարանական, ինչպես նաև “Սուրբ Հովսեփ” Կաթոլիկ եկեղեցիներում տեղի ունեցան հայոց ցեղասպանության 100-րդ տարելիցին նվիրված հիշատակի ոգեկոչման արարողություններ:
Միջոցառումները լուսաբանվեցին Բուլղարիայի Ազգային և “Նովա” հեռուստաալիքներով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր