Տեղեկատվական տեխնոլոգիաների ոլորտում հայ-բուլղարական բիզնես-ֆորում Սոֆիայում

03 նոյեմբերի, 2015

Ս.թ. հոկտեմբերի 30-ին «Թեքնոլոջի ընդ Սայնս Դայնամիքս» ընկերության նախաձեռնած` Եվրոպայում հայկական տեղեկատվական և հեռահաղորդակցության ավտոարշավի շրջանակներում Սոֆիայի ,,Գրանդ հոտել Սոֆիա,, հյուրանոցում կայացավ «Հայաստանի և Բուլղարիայի միջև համագործակցության հնարավորությունները» խորագրով գործարար համաժողով: ՀՀ վարչապետի հովանու ներքո անցնող միջոցառման կազմակերպմանը աջակցել էին ՀՀ էկոնոմիկայի նախարարությունը, Բուլղարիայում ՀՀ դեսպանությունը և Բուլղարիայի տրանսպորտի, կապի և հաղորդակցության նախարարությունը:

Համաժողովի բացմանը ողջույնի խոսքով հանդես եկավ Բուլղարիայում ՀՀ դեսպան Արսեն Սհոյանը: Նա կարևորրեց տեղեկատվական և հեռահաղորդակցման տեխնոլոգիաների (ՏՀՏ) ոլորտը Հայաստանի տնտեսության զարգացման համար, միաժամանակ ընդգծելով ՀՀ տնտեսության մեջ այդ ոլորտի արագ աճը, ներդրումը և լայն կիրառությունը:

Ելույթներով հանդես եկան Բուլղարիայի տրանսպորտի, կապի և հաղորդակցության նախարարության ,,Տեղեկատվական տեխնոլոգիաներ,, տնօրինության տնօրեն Հրիստո Հրիստովը, Բուլղարիայի առևտրա-արդյունաբերական պալատի նախագահ Ցվետան Սիմենովը, Բուլղարիայի փոքր և միջին ձեռնարկությունների ազգային կենտրոնից Բորյանա Մինչևան:

Հայկական պատվիրակության ղեկավար, ,,Նյու թեքնոլոջի էդյուքեյշն,, հիմնադրամի տնօրեն Վահան Հովսեփյանի թեման` ,,Իրերի ինտերնետ,, մեծ հետաքրքրություն առաջացրեց:

Մասնագիտական քննարկումներ ընթացան հայկական և բուլղարական ընկերությունների միջև, հաստատվեցին շահագրգիռ և գործնական կապեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր