,,Ապրիլի 24-ի հետքերով,, Լուսանկարչական ցուցահանդես Սոֆիայում նվիրված հայոց ցեղասպանության 100-ամյա տարելիցին

01 դեկտեմբերի, 2015

Սոֆիայի հայկական կազմակերպությունների համադրիչ խորհրդի նախաձեռնությամբ ս.թ. նոյեմբերի 27-ին Սոֆիայի ռուսական մշակութային կենտրոնում տեղի ունեցավ բուլղարահայ հայտնի լուսանկարիչ Մարի Քնալյանի` Հայոց ցեղասպանության 100-ամյա տարելիցին նվիրված լուսանկարչական ցուցահանդեսի հանդիսավոր բացումը` ԲՀ-ում ՀՀ դեսպան Արսեն Սհոյանի պաշտոնական հովանավորությամբ:

Իր ելույթում դեսպանը մասնավորապես նշեց, որ տասնյակ հազարավոր փրկված հայերի հիշողություններով, վկայություններով մենք կարողանում ենք պատկերացում կազմել 100 տարի առաջ տեղի ունեցած սարսափների մասին: Քսաներորդ դարի առաջին ցեղասպանության ուղիղ վկայություններն այդ տարիներին պատմության մեջ հավերժացած լուսանկարիչների գործերն են, ովքեր վտանգելով սեփական կյանքը, կատարել են ոչ միյան իրենց մասնագիտական, այլև մարդկային պարտքը:

50-ամյա հայրենանվեր աշխատանքի, Սփյուռքում հայկական արվեստը տարածելու և ճանաչելի դարձնելու, ինչպես նաև Հայաստան-Սփյուռք համագործակցության գործում ներդրում ունենալու համար դեսպան Սհոյանը Մարի Քնալյանին հանձնեց ՀՀ սփյուռքի նախարարության ,,Արշիլ Գորկի,, մեդալը:

ՀՀ Ազգային ժողովի նախագահի տեղակալ Հերմինե Նաղդալյանն իր ելույթում երախտագիտություն հայտնեց Բուլղարիային 100 տարի առաջ շուրջ հարյուր հազար ցեղասպանությունից փրկված հայի ապաստան տալու, Բուլղարիան նրանց երկրորդ հայրենիքը դարձնելու և Բուլղարիայի Ժողովրդական ժողովի 2015թ.-ի ապրիլի 24-ին առաջին անգամ ընդունած Օսմանյան կայսրությունում հայերի զանգվածային բնաջնջման ճանաչման մասին որոշման ու ապրիլի 24-ը Բուլղարիայում հիշատակման օր հռչակելու համար:

Միջոցառման ավարտին բուլղարահայ հայտնի երգիչ և երգահան Հայկաշոտ Աղասյանը կատարեց Բուլղարիայում հանրաճանաչ բանաստեղծ Վանյա Պետկովայի “Հայի աչեր” երգը, ինչպես նաև իր հեղինակած “Հայաստան” երգը:

Հանդիսությանը ներկա էին և ելույթներ ունեցան ԲՀ ժուռնալիստների միության, ԲՀ լուսանկարչական ակադեմիայի ներկայացուցիչներ, մտավորականներ, արվեստագետներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր