Դեսպան Սարգսյանի հանդիպումը Բուլղարիայի մշակույթի նախարարի հետ

12 հուլիսի, 2016

Ս.թ. հուլիսի 11-ին Բուլղարիայում ՀՀ դեսպան Արմեն Սարգսյանը հանդիպում ունեցավ ԲՀ մշակույթի նախարար Վեժդի Ռաշիդովի հետ:

Տեղի ունեցած զրույցի ընթացքում ընդգծվեց, որ հարաբերությունները Հայաստանի և Բուլղարիայի մշակույթի նախարարությունների միջև գտնվում են բարձր մակարդակի վրա՝ կարևորելով նաև երկու երկրների դեսպանությունների աշխատանքն այդ հարցում:

Դեսպան Սարգսյանը նախարար Ռաշիդովին ներկայացրեց դեսպանության առաջիկա մշակութային ծրագրերը և այն միջոցառումները, որոնք նվիրված են ՀՀ անկախության 25-րդ տարեդարձին: Քննարկման արդյունքում համաձայնություն ձեռք բերվեց Սոֆիայում հայկական ֆիլմերի ցուցադրության և Հայաստանին նվիրված լուսանակարչական ցուցահանդեսի կազմակերպման վերաբերյալ:

Որոշվեց Սոֆիայում ժամանակակից հայ գեղանկարիչների աշխատանքների ցուցահանդես-վաճառք կազմակերպելու, “Պլամակ” ամսագրի Հայաստանին նվիրված հատուկ թողարկման շնորհանդես իրականացնելու մասին:

Քննարկվեցին նաև համատեղ կինոարտադրություն, Հայաստանում հնագիտական պեղումներ, ինչպես նաև հին մշակութային արժեքների պահպանման և վերականգնման աշխատանքներ իրականացնող մասնագիտական խմբեր ստեղծելու հարցերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր