Դեսպան Ա. Սարգսյանի շնորհավորական ուղերձը Հայաստանի Հանրապետության անկախության տարեդարձի կապակցությամբ

21 սեպտեմբերի, 2017

Սիրելի՛ հայրենակիցներ,
Սրտանց շնորհավորում եմ Հայաստանի Հանրապետության անկախության տարեդարձի կապակցությամբ:
Հայ ժողովուրդը դարեր շարունակ պայքարել ու շատ թանկ գին է վճարել իր սեփական հողում ազատ ու անկախ ապրելու համար: Անկախության վերականգնումից քսանվեց տարի անց մենք կյանքի ենք կոչում Հայոց պետության ամրապնդման ու զարգացման ծրագրեր, իրականացնում ենք բարեփոխումներ ժողովրդավարության խորացման, տնտեսության, գիտության, մշակույթի զարգացման և այլ ուղղություններով: Այսօր Հայաստանին անհրաժեշտ է հուսալի պաշտպանություն, խաղաղ աշխատանք և կայուն զարգացում:
Անկախության հռչակումով նոր դարաշրջան բացվեց ոչ միայն Հայաստանի, այլև Արցախի և սփյուռքի համար: Մենք համատեղ լուրջ քայլեր ենք ձեռնարկում, այդ թվում Հայոց ցեղասպանության ճանաչման և Արցախի հիմնահարցի արդարացի կարգավորման ուղղությամբ:
Հայաստանի, Արցախի և աշխարհի 70 երկրից ավելի քան 1500 ներկայացուցիչներ օրերս Երևանում մասնակցեցին «Փոխադարձ վստահություն, միասնականություն և պատասխանատվություն» կարգախոսով անցկացված վեցերորդ համահայկական համաժողովին: Նման հավաքների շնորհիվ հնարավոր է ամփոփել Հայաստան-Սփյուռք գործակցության ներկա արդյունքները և ծրագրել ապագային միտված համատեղ անելիքները: Եվ հայ ժողովրդի յուրաքանչյուր զավակ պետք է իր դերակատարությունն ունենա այս գործընթացում: Մենք պետք է միասնական լինենք մեր նպատակներին հասնելու համար:
Սիրելի՛ հայրենակիցներ,
Սեպտեմբերի 21-ը տոն է համայն հայության համար: Այն մեր հավատի, համոզմունքների ու վստահության խորհրդանիշն է։ Հայաստանի Հանրապետությունն այն ամուր հիմքն է, որի վրա կերտվում է ողջ հայության դարավոր երազանքը ու հպարտությունը՝ հզոր, ծաղկող ու բարգավաճող Հայրենիքը:
Կրկին շնորհավորում եմ բոլորիս այս մեծ տոնի առթիվ:

ԱՐՄԵՆ ՍԱՐԳՍՅԱՆ
Բուլղարիայի Հանրապետությունում
Հայաստանի Հանրապետության
արտակարգ և լիազոր դեսպան

21 սեպտեմբերի 2017թ.
ք. Սոֆիա

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր