Դեսպան Ա. Սարգսյանի շնորհավորական ուղերձը Բուլղարիայի հին մայրաքաղաք Պլիսկայում մեծ բանաստեղծ Պեյո Յավորովի կիսանդրին բացելու կապակցությամբ

02 նոյեմբերի, 2017

Սիրելի բարեկամնե՜ր,
Ողջունում և շնորհավորում եմ Բուլղարիայի հին մայրաքաղաք Պլիսկայում մեծ բանաստեղծ Պեյո Յավորովի կիսանդրին բացելու կապակցությամբ:
Դժվար է թերագնահատել Պեյո Յավորովի պատմական դերն իր ժողովրդի հոգևոր պատկերի կերտման, ինչպես նաև հայերի և բուլղարացիների միջև բարեկամական կապերի ձևավորման գործում: Նա ոչ միայն բուլղար ժողովրդի ազատագրական պայքարի երգիչն է. գրելով «Հայերը» բանաստեղծությունը, նա մի անձեռակերտ կամուրջ է կառուցել նույն ճակատագրով կապված երկու ժողովուրդների միջև:
Բուլղարական պոեզիայի դասականը լայն ճանաչում ունի նաև Հայաստանում: Դեռևս կես դար առաջ Երևանի Գաբրիել Սունդուկյանի անվան թատրոնում բեմադրվել է նրա հեղինակած «Վիտոշայի փեշերին» ողբերգությունը: Իսկ Երևանի թիվ 131 միջնակարգ դպրոցը հպարտորեն կրում է Պեյո Յավորովի անունը, և մեծ բանաստեղծի հուշարձանը վեր է խոյանում կրթօջախի առջև։
Համոզված եմ, որ այսօր բացված Պեյո Յավորովի կիսանդրին կդառնա Կիրիլիցայի աշխարհի գրողներին հավերժացնող հուշահամալիրի կենտրոնական քանդակներից մեկը:
Իմ գնահատանքի և շնորհակալության խոսքն եմ հղում հայտնի գործարար և բարերար Կարեն Ալեքսանյանին, ում ջանքերով է ստեղծվել Կիրիլիցայի մշակութային համալիրը, ինչպես նաև հայազգի այն բոլոր անհատներին ու կազմակերպություններին, ովքեր իրենց ջանքերն ու միջոցները ներդրեցին հայ-բուլղարական բարեկամության այս նոր խորհրդանիշը կերտելու պատվաբեր գործին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր