Հայկական ծիրանից պատրաստված կոսմետիկան մտնում է բուլղարական շուկա

03 նոյեմբերի, 2017

Ս.թ. նոյեմբերի 3-ին Բուլղարիայում ՀՀ դեսպան Արմեն Սարգսյանն այցելեց Սոֆիայում կազմակերպված „Բնական և կենսաբանական մթերքներ առողջության և գեղեցկության համար“ խորագրով տոնավաճառ, ուր առաջին անգամ առանձին տաղավարով ներկայացված էր հայկական „Ա.Կ.Լ. Հովհաննիսյան“ ընկերության արտադրության բնական կոսմետիկա ծիրանի, ծիրանի կորիզի և մեղրի էկոլոգիապես մաքուր հումքից և ավանդական բաղադրատոմսերով:
Նշված տեսականին ներկրող բուլղարական „ApricoPro“ ընկերության նախագահ Մարգարիտա Վասիլևան տեղեկացրեց, որ նման ապրանքներ Հայաստանից առաջին անգամ են ներմուծվում Բուլղարիա: Գոհունակությամբ նշելով, որ հայկական արտադրանքը մեծ հետաքրքրություն է առաջացրել հաճախորդների և մասնագետների շրջանում՝ նա, այնուամենայնիվ, արձանագրեց, որ դեռևս պետք է շատ աշխատել, որպեսզի այն գտնի բուլղարական շուկայում իր պատշաճ տեղը: Վասիլևան ավելացրեց, որ առաջիկայում ընկերությունը ծրագրում է հայկական արտադրանքը ներկայացնել նաև Պլովդիվ, Վառնա և Բուրգաս քաղաքներում:
Ողջունելով ընկերության նախաձեռնությունը՝ դեսպան Ա. Սարգսյանը նշեց, որ դեսպանությունը պատրաստ է իր աջակցությունը ցուցաբերել Բուլղարիայում հայկական ապրանքների ներկայացման և տարածման գործում: Այս առնչությամբ նա տեղեկացրեց, որ ս.թ. դեկտեմբերի սկզբին Սոֆիայում կազմակերպվում է ամենամյա բարեգործական տոնավաճառ, որին առանձին տաղավարով մասնակցելու է նաև Բուլղարիայում ՀՀ դեսպանությունը: Դեսպանն առաջարկեց „ApricoPro“ ընկերությանը հայկական այլ ապրանքների հետ մեկտեղ ներկայացնել նաև իր տեսականին: Նախաձեռնությունը շնորհակալությամբ ընդունվեց ընկերության կողմից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր