Դեսպան Արմեն Սարգսյանի հանդիպումը Բուլղարիայի Ստարա Զագորայի մարզպետի հետ

10 նոյեմբերի, 2017

Ս.թ. նոյեմբերի 9-ին ԲՀ-ում ՀՀ դեսպան Արմեն Սարգսյանն աշխատանքային այցով գտնվում էր Բուլղարիայի Ստարա Զագորայի մարզում, ուր հանդիպում ունեցավ մարզպետ Գերգանա Նիկովայի հետ:
Ողջունելով ՀՀ դեսպանին մարզպետը նշեց, որ հոգեհարազատ է ընդունում հայերին և կարևորում է երկու ժողովրդների միջև ավանդական բարեկամական կապերը:
Դեսպան Ա. Սարգսյանն իր երախտագիտությունը հայտնեց բուլղար ժողովրդին, ով դար առաջ հանգրվան տվեց ցեղասպանությունից փրկված հազարավոր հայերի: Նա շնորհակալություն հայտնեց նաև մարզի իշխանություններին հայ մշակույթն ու ավանդույթները պահպանելու գործում մեծ օգնություն և օժանդակություն ցուցաբերելու համար:
Հանդիպման ժամանակ կողմերն անդրադարձան Հայաստանի և Բուլղարիայի միջև առկա սոցիալ-տնտեսական համագործակցության հետ կապված հարցերին: Այս ենթատեքստում քննարկվեց Ստարա Զագորայի մարզի և Հայաստանի մարզերից մեկի միջև բարեկամական կապեր հաստատելու հնարավորությունը: Կարևորվեց, մասնավորապես, մարզերի միջև մշակութային և կրթական ծրագրերի իրականացման անհրաժեշտությունը:
Մարզպետ Գ. Նիկովան երախտագիտությամբ ընդունեց ներկայացված առաջարկությունը և պատրաստակամություն հայտնեց ջանքեր գործադրել այդ ուղղությամբ:
Նույն օրը երեկոյան դեսպան Ա. Սարգսյանը մասնակցեց „Էթնիկ Բուլղարիա“ կազմակերպության կողմից նախաձեռնած` Բուլղարիայում բնակվող ազգային փոքրամասնությունների ինքնագործ խմբերի «Տարբեր` բայց միասին" կարգախոսը կրող ավանդական փառատոնին, ուր հանդես եկան նաև Պլովդիվից ժամանած երգի և պարի հայկական համույթները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր