Սոֆիայում բացվել է բուլղարահայ նկարչի ցուցահանդեսը

28 նոյեմբերի, 2017

Սոֆիայում տեղի ունեցավ բուլղարահայ գեղանկարիչ Գրոնիկա Կավաֆյանի „Հայաստանի հետքերով“ վերտառությամբ ցուցահանդեսի հանդիսավոր բացման արարողությունը:
Միջոցառմանը, որը կազմակերպվել էր ՀԲԸՄ Սոֆիայի գրասենյակի աջակցմամբ, ներկա էին բազմաթիվ արվեստի գործիչներ, հասարակական կազմակերպությունների, հայ համայնքային կառույցների ներկայացուցիչներ:
Ընթացիկ տարվա ամռանը, առաջին անգամ այցեցելով Հայաստան և խորը տպավորվելով հայոց բնաշխարհի հեքիաթային գույներով և ձայներով՝ Գ. Կավաֆյանը որոշեց կտավին հանձնել իր տպավորությունները և այսպիսով հանրությանը ներկայացնել իր կողմից բացահայտած հայրենի երկիրը:
Այցելուների մեկնաբանությամբ, նրանք կարծես զգում ու վայելում էին հայկական դուդուկի ձայնն ու ճարտարապետության հնագույն կոթողների վեհությունը, Սևանա լճի բյուրեղյա ջրերն ու հայկական քոչարիի առնական ռիթմերը:
Հետաքրքրական է, որ Գ. Կավաֆյանի ստեղծագործությունները ցուցադրվում են Սոֆիայի „Arena di Serdika“ հյուրանոցային համալիրի մաս կազմող և պետության կողմից խնամքով պահպանվող` Բուլղարիայի հին մայրաքաղաք Սերդիկայի ավերակների ֆոնի վրա, ինչը օտարերկրյա զբոսաշրջիկներին և բուլղար այցելուներին առավել մատչելի է դարձնում Հայաստանը բացահայտելու այս յուրահատուկ ձևը:
Ցուցահանդեսը կշարունակվի մինչև ս.թ. դեկտեմբերի 12-ը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր