Բուլղարիայում տեղի ունեցավ ոչխարաբուծության միջազգային հավաք-տոնավաճառ

14 մայիսի, 2018

Մայիսի 11-13-ը ԵՄ Խորհրդում Բուլղարիայի նախագահության միջոցառումների շրջանակներում, Բուլղարիայի գյուղատնտեսության և մթերքի նախարարության և Բուլղարիայի ազգային ոչխարաբուծության ասոցիացիայի նախաձեռնությամբ Վելիկո Տըրնովո քաղաքում անցկացվեց ոչխարաբուծության 7-րդ ազգային հավաք-տոնավաճառը, որին մասնակցելու համար ժամանել էին 18 երկրներից մի քանի տասնյակ ընկերություների ու կազմակերպությունների ներկայացուցիչներ, բազմաթիվ ժողովրդական ինքնագործ խմբեր, հազարավոր այցելուներ Բուլղարիայի տարբեր բնակավայրերից և բազմաթիվ զբոսաշրջիկներ:

Եվրոպական մշակութային ժառանգության տարվա մաս կազմող այս հավաքի շրջանակներում կազմակերպվեցին աշխատանքային քննարկումներ, բազմակողմ և երկկողմ հանդիպումներ, որոնց ընթացքում ներկայացվեցին ոչխարաբուծության բնագավառում կիրառվող գյուղատնտեսական և արդյունաբերական նորույթներ, սարքավորումներ, հովվության նյութական և ոչ նյութական ժառանգության նմուշներ: Ամբողջ տոնավաճառի ընթացքում այցելուներին էին առաջարկվում ոչխարաբուծության տարատեսակ արտադրանք, զուգահեռ ելույթ էին ունենում մի շարք երկրներից և Բուլղարիայի տարբեր շրջաններից ժամանած ազգային երքի ու պարի համույթներ:

Հավաքի աշխատանքներին մասնակցեց Բուլղարիայում ՀՀ դեսպան Արմեն Սարգսյանը: Նա ներկայացրեց Հայաստանի գյուղատնտեսության զարգացման հեռանկարներն ու առաջնայնությունները, անդրադարձ կատարեց ոչխարաբուծության դարավոր ավանդույթներին, խոսեց այս բնագավառում իրականացվող ծրագրերի, Հայաստանում ստեղծված շահավետ ներդրումային միջավայրի մասին: Նկատի ունենալով հայկական ոչխարաբուծության ավանդույթներն ու փորձը՝ կազմակերպիչները շեշտեցին հետագայում նման միջոցառումներին Հայաստանի ներկայացուցիչների, այդ թվում կաթնատու ոչխարաբուծությամբ և այծաբուծությամբ զբաղվող ընկերությունների մասնակցության կարևորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր