Հայկական ավանդական խոհանոցը ներկայացվեց Բուլղարիայում

15 մայիսի, 2018

Ս.թ. մայիսի 11-15-ը Բուլղարիայի Պլովդիվ քաղաքում կազմակերպվել և գործում է “Էթնոխոհանոց անիվների վրա” խոհարարական արվեստին նվիրված տոնավաճառը: “Հացը՝ սուրբ սննդամթերք է և աշխարհի ժողովուրդների հիմնական սնունդը” խորագիրը կրող այս միջոցառմանը, որը կազմակերպվել է Պլովդիվում գործող “Միասին” հիմնադրամի նախաձեռնությամբ, ներկայացված են իտալական, ռուսական, հայկական, հրեական և թուրքական հացատեսակներն ու այդ երկրների ավանդական խոհանոցների բազմաթիվ այլ նմուշներ:

Մայիսի 13-ին տոնավաճառում հայկական ավանդական խոհանոցի օրն էր, որի բացման արարողությանը մասնակցեց Բուլղարիայում ՀՀ դեսպան Արմեն Սարգսյանը: Պլովդիվի Հայ մշակութային տեղեկատվական կենտրոնի հիմնադիր և “Միասին” հիմնադրամի անդամ Աղավնի Գևորգյանը ներկայացրեց հայկական տաղավարի առանցքը հանդիսացող հայկական լավաշը՝ նշելով, որ այն ունի 3000 տարվա պատմություն և 2014թ. ներառվել է ՅՈՒՆԵՍԿՕ-ի ոչ նյութական մշակութային ժառանգության ներկայացուցչական ցանկում: Ներկայացվեցին նաև հայկական քաղցրավենիքն ու աղցանը, ղարաբաղյան ավանդական ժենգյալով հացն ու չորացրած մրգերով հատուկ փլավը, ձավարով ՙՙանուշ ապուրը՚՚:

Պլովդիվի “Երևան” պարային համույթը կատարեց թատերականացված Հարսանեկան պարը, որը ներկայացնում էր մի շարք հայկական ավանդույթներ, այդ թվում հայկական խորովածով պարը, լավաշն ուսերին և ափսեներ կոտրելով նորապսկաների պարը:

Տոնավաճառի բազմաթիվ այցելուներ հնարավորություն ունեցան համտեսելու հայկական խորովածը, ղարաբաղյան ժենգյալով հացը, բազմաթիվ այլ ուտեստներ ու քաղցրավենիք: Միջոցառման ամբողջ ընթացքում հնչում էր հայկական երաժշտություն:

Նշենք, որ հայկական խոհանոցի նկատմամբ հետաքրքրությունը չափազանց մեծ էր. տաղավարների մոտ այցելուների երկար հերթեր էին գոյացել:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր