Դեսպան Սարգսյանը հանդիպեց հայերեն սովորող բուլղար ուսանողների հետ

07 հունիսի, 2018

Ս.թ. հունիսի 7-ին Բուլղարիայում Հայաստանի դեսպան Արմեն Սարգսյանի հրավերով դեսպանություն այցելեցին Սոֆիայի „Սուրբ Կլիմենտ Օխրիդսկի“ պետական համալսարանի “Հայագիտություն և կովկասագիտություն” բաժնի մի շարք ուսանողներ՝ դասախոսների ուղեկցությամբ: Սա արդեն ավանդական դարձած երկրորդ հանդիպմն էր նման ձևաչափով, որի ընթացքում հայոց լեզու, հայ մշակույթ և պատմություն ուսումնասիրող ուսանողները հնարավորություն են ստանում անմիջապես ՀՀ դեսպանության միջոցով ծանոթանալու Հայաստանում տեղի ունեցող իրադարձություններին, պատասխաններ ստանալ իրենց հուզող հարցերին:

Դեսպան Սարգսյանը հյուրերին ներկայացրեց դեսպանության գործունեության որոշ ուղղություններ, խոսեց հայ-բուլղարական հարաբերությունների, կրթության և մշակույթի բնագավառում երկկողմ համագործակցության մասին: Անդրադարձ կատարեց սույն թվականի փետրվարին Բուլղարիայի նախագահի՝ Հայաստան կատարած պետական այցի որոշ մանրամասների: Դեսպանը հյուրերի ուշադրությունը հրավիրեց աշխարհի բազմաթիվ երկրներում բնակվող հայերի և Հայրենիքի միջև կապերի ամրապնդման հրամայականին, մայրենի լեզվի պահպանման և դասավանդման գործում առկա դժվարություններին և խնդիրներին:

Պատասխանելով ուսանողների հարցերին և արձագանքելով նրանց ցանկություններին՝ դեսպան Սարգսյանը խոստացավ հնարավորինս նպաստել Բուլղարիայում հայագիտության զարգացմանը, աջակցել ՀՀ կառավարության տարբեր ծրագրերի և միջոցառումների շրջանակներում բուլղար ուսանողների Հայաստան ճանաչողական այցերի և հայոց լեզվի դասընթացների մասնակցությանը:

Դեսպանն առաջարկեց ստեղծել գործընկերային կապեր Սոֆիայի համալսարանի և Երևանի համալսարաններից մեկի միջև՝ երկարաժամկետ համագործակցություն հաստատելու և մշտական ուսանողական փոխանակումներ իրականացնելու նպատակով:

Նշենք, որ ներկայումս Սոֆիայի „Սուրբ Կլիմենտ Օխրիդսկի“ համալսարանում հայերեն են սովորում 11 ուսանողներ, որոնցից յոթն ազգությամբ բուլղարներ են, երկուսը՝ հայեր, մեկը՝ թուրք:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր