Դեսպան Ա. Սարգսյանի ամանորյա շնորհավորական ուղերձը

18 դեկտեմբերի, 2018

Սիրելի՜ հայրենակիցներ,

Սրտանց շնորհավորում եմ Ամանորի և Սուրբ Ծննդյան տոների կապակցությամբ:

2018 թվականը մեր Հայրենիքի համար լի էր կարևորագույն իրադարձություններով: Գարնանը Հայաստանում տեղի ունեցավ «սիրո և համերաշխության» հեղափոխությունը, որի պատմական ձեռքբերումներն ամրագրվեցին դեկտեմբերին կայացած արտահերթ խորհրդարանական ընտրություններով: Ակտիվ ընթանում են բարեփոխումներ քաղաքական, տնտեսական, գիտակրթական, մշակութային և այլ բնագավառներում: Այս գործընթացը կշարունակվի նաև 2019 թվականին, որը նույնպես խոստանում է լինել հարուստ նոր ձեռքբերումներով պետական շինարարության, տնտեսական զարգացման, ներքին և արտաքին քաղաքականության բնագավառներում:

Ընթացիկ տարին հագեցած էր նաև հայ-բուլղարական բարեկամական հարաբերությունների զարգացման և խորացման առումով: Ամենակարևոր իրադարձությունը Բուլղարիայի նախագահ Ռումեն Ռադևի պետական այցն էր Հայաստան, որի ընթացքում ձեռք բերվեցին մի շարք պայմանավորվածություններ, ստորագրվեցին երկկողմ փաստաթղթեր: Այցը նոր թափ հաղորդեց մեր երկու եղբայրական երկրների համագործակցությանը, որը կշարունակվի զարգանալ գալիք տարում:

Սիրելի՜ բարեկամներ,

2019 թվականի նախաշեմին ցանկանում եմ շնորհավորել ոչ միայն մեր հայրենակիցներին, այլև Բուլղարիայի բոլոր քաղաքացիներին` անկախ նրանց ազգային և կրոնական պատկանելիությունից, առանձնահատուկ նշելով նրանց, ովքեր իրենց նպաստն են բերում բարեկամական հարաբերությունների զարգացմանը ինչպես Հայաստանի, այնպես էլ սփյուռքում բնակվող մեր բազմաթիվ հայրենակիցների հետ:

Նոր տարում բոլորիս մաղթում եմ խաղաղ երկինք, ամուր առողջություն և ընտանեկան մեծ երջանկություն:

Շնորհավո՜ր Ամանոր և Սուրբ Ծնունդ:

ԱՐՄԵՆ ՍԱՐԳՍՅԱՆ

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր