«Երևան» շաբաթաթերթի 75-ամյա հոբելյանի առիթով դեսպան Ա.Սարգսյանի շնորհավորական ուղերձը

12 ապրիլի, 2019

Սիրելի բարեկամներ,

Բուլղարիայում ՀՀ դեսպանության անունից սրտանց շնորհավորում եմ «Երևան» շաբաթաթերթի 75-ամյա հոբելյանի կապակցությամբ։

1944 թ.-ից ի վեր «Երևան» գրական, հասարակական-քաղաքական և մշակութային շաբաթաթերթը դարձել է հայ-բուլղարական իրադարձությունների վկաներից մեկը: Թերթի համար անցած այդ յոթանասունհինգ տարիները հաստատման, կայացման, զարգացման տարիներ էին, որի շնորհիվ այսօր այն իր արժանի տեղն է զբաղեցնում հայրենիքից հեռու գտնվող բուլղարահայերի կյանքում:

Լուսաբանելով ինչպես Բուլղարիայի, այնպես էլ Հայաստանի հասարակական-քաղաքական, տնտեսական և մշակութային կյանքին առնչվող իրադարձությունները՝ թերթը միաժամանակ ընթերցողին է ներկայացնում հայ գիտնականներին, հասարակական-քաղաքական գործիչներին, մշակույթի ներկայացուցիչներին, պատմում է բուլղարահայ համայնքում տեղի ունեցածի մասին։

«Երևանը» արձանագրում է Հայաստանի տնտեսության, արդյունաբերության, գիտության ու արվեստի հաջողությունները, տպագրում արձակ և չափածո գործեր։ Հիրավի, թերթն իր արժանի տեղն է զբաղեցնում բուլղարահայ համայնքի հասարակական կյանքում և համոզված եմ, այն դեռ բազում տարիներ կընթերցվի գալիք սերունդների կողմից:

Այսօր պետք է երախտագիտությամբ հիշատակենք թերթի ստեղծման և սերնդեսերունդ փոխանցման գործում մեծագույն ավանդն ունեցած բոլոր նախկին խմբագիրներին` առանձնացնելով այստեղ ներկա հարգարժան Կարո Հայրապետյանին:

Կցանկանայի առանձնահատուկ ընդգծել տիկին Վարդանուշ Թոփաքբաշիյանի, ինչպես նաև Անահիտ Աջերյանի անձնական մեծ ներդրումը թերթի զարգացման գործում:

Կրկին սիրով շնորհավորում եմ «Երևան» շաբաթաթերթի խմբագրակազմին այս գեղեցիկ հոբելյանի կապակցությամբ՝ մաղթելով հաջողություններ և արգասաբեր աշխատանք` ի շահ մեր երկու երկրների բարեկամության ամրապնդման և բուլղարահայ համայնքի բարգավաճման։

Արմեն Սարգսյան

Բուլղարիայում ՀՀ դեսպան

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր