ՀՀ Անկախության օրվա առիթով ՀՀ դեսպանությունում հավաք-ընդունելություն

24 սեպտեմբերի, 2019

ՀՀ Անկախության օրվա առիթով 2019 թ. սեպտեմբերի 24-ին Սոֆիայում ՀՀ դեսպանությունում կազմակերպվեց հավաք-ընդունելություն՝ Սոֆիայում գործող հայկական համայնքային և եկեղեցական կառույցների ղեկավարների և ներկայացուցիչների մասնակցությամբ:

Դեսպան Ա. Սարգսյանը համառոտ ներկայացրեց դեսպանության և բուլղարահայ կազմակերպությունների միջև համագործակցության առկա մակարդակը և դրա զարգացման հեռանկարները: Նա կոչ արեց համայնքային կառույցներին է՛լ ավելի ակտիվացնել հայապահպանմանն ուղղված իրենց նվիրաբեր գործունեությունը և բազմապատկել ջանքերը Հայաստանի և Բուլղարիայի միջև կապերի ամրապնդման, համատեղ ծրագրերի իրականացման գործում:

Քննարկվեցին ընթացիկ տարվա ծրագրերով նախատեսված համատեղ միջոցառումների իրականացման հետ առնչվող հարցեր: Այս համատեքստում դեսպան Ա. Սարգսյանը տեղեկացրեց, որ ս.թ. դեկտեմբերի սկզբին Սոֆիայում կազմակերպվելու է ամենամյա բարեգործական դիվանագիտական տոնավաճառ, որին Հայաստանը պատշաճ կերպով ներկայացնելու համար անհրաժեշտ է բոլոր համայնքային կառույցների և հայազգի գործարարների շահագրգիռ մասնակցությունն ու աջակցությունը:

Հանդիպումից հետո հյուրերը հրավիրվեցին մասնակցելու դեսպանության կողմից կազմակերպված տոնական ընդունելությանը: Շնորհավորելով ներկաներին Հայաստանի Անկախության օրվա կապակցությամբ՝ դեսպան Ա. Սարգսյանն առանձնահատուկ ընգծեց Հայաստանում այսօր տեղի ունեցող հեղափոխական բարեփոխումների կարևորությունը: Նա նաև կարևորեց բուլղարահայ համայնքի ստեղծագործ ներուժի լիարժեք օգտագործումը ոչ միայն Բուլղարիայի և Հայաստանի միջև երկկողմ հարաբերությունների զարգացման, այլև Հայաստանի Հանրապետության և համայն հայության հետագա բարգավաճման գործում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր