Դիվանագիտական բարեգործական տոնավաճառ

01 դեկտեմբերի, 2019

2019թ. դեկտեմբերի 1-ին Բուլղարիայում Հայաստանի դեսպանությունը հերթական անգամ մասնակցեց Սոֆիայի միջազգային ցուցահանդեսային կենտրոնում կազմակերպված 25-րդ ամենամյա դիվանագիտական բարեգործական տոնավաճառին (Charity Bazaar): Միջոցառմանն իրենց մասնակցությունը բերեցին Բուլղարիայում հավատարմագրված ավելի քան 60 դիվանագիտական ներկայացուցչություններ, միջազգային և բարեգործական կազմակերպություններ: Տոնավաճառի շրջանակներում գործող մշակութային հարթակում տարբեր դեսպանություններ ներկայացնող բազմաթիվ ստեղծագործ խմբեր և անհատներ ներկայացրեցին իրենց ժողովուրդների ազգային արվեստն ու երաժշտությունը, մշակույթն ու ավանդույթները, երգն ու պարը:

Հայաստանի տաղավարը հագեցած էր հայկական խմիչքներով, այդ թվում «Արարատ» և այլ գործարանների կոնյակի, գինու և օղու մեծ տեսականիով, «Ջերմուկ» հանքային ջրով: Բուլղարիայի հայազգի բազմաթիվ ընկերություններ և անհատ ձեռներեցներ տրամադրել էին հայկական խորոված, լավաշ, տոլմա, գաթա, այլ թխվածքներ և ուտեստներ: Տաղավարը զարդարված էր հայ կիրառական արվեստի նմուշներով:

Հայկական տաղավարում ցուցադրված էր և մեծ պահանջարկ ունեցավ Հայաստանից ներմուծված բնական կոսմետիկան՝ պատրաստված հայկական ավանդական բաղադրատոմսերով ծիրանի և մեղրի էկոլոգիապես մաքուր հումքից:

Ցուցահանդեսային կենտրոնի բեմահարթակում կազմակերպված գալա-համերգին հայ երաժշտությունն ու երգարվեստը ներկայացրեցին Հայաստանից ժամանած երգչուհի Հասմիկ Հարությունյանը և քանոնահար Էթերի Հովհանեսյանը, բուլղարահայ հայտնի երգիչ Արթուր Նադոսյանը, իսկ հայ պարարվեստը ներկայացրեց Սոֆիայի «Նաիրի» պարային համույթը: Ելույթներն ունեցած մեծ հաջողություն:

Հայաստանի տաղավարի այցելուներին ողջունում և հայկական ապրանքները ներկայացնում էին դեսպան Ա. Սարգսյանը, դեսպանության ողջ անձնակազմը, հայ համայնքի ներկայացուցիչները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր