Կոմիտասի և Թումանյանի 150-ամյա հոբելյաններին նվիրված ամփոփիչ գալա-համերգը

15 դեկտեմբերի, 2019

2019թ. դեկտեմբերի 15-ին ԲՀ-ում ՀՀ դեսպանության նախաձեռնությամբ Սոֆիայի «Հայ ազգային տանը» տեղի ունեցավ մեծանուն հայ երգահան Կոմիտասի և ամենայն հայոց բանաստեղծ Հովհաննես Թումանյանի 150-ամյա հոբելյաններին նվիրված ամփոփիչ գալա-համերգը:

Ողջույնի խոսքով հանդես եկավ դեսպան Ա. Սարգսյանը, ով ներկայացրեց միջոցառման խորհուրդը, նշելով, որ Կոմիտասի և Թումանյանի ստեղծագործությունները հայտնի են ոչ միայն Հայաստանում, այլև աշխարհի տարբեր երկրներում: «ՅՈՒՆԵՍԿՕ-ն, ի նշանավորումն մեր մեծերի ստեղծած մշակութային ժառանգության, Կոմիտասի և Թումանյանի 150-ամյակները ներառել է «Հռչակավոր մարդկանց և կարևոր իրադարձությունների ցանկում»,- նշեց դեսպան Ա. Սարգսյանը: Նա ընդգծեց Կոմիտասի ժառանգության կարևորությունը Հայաստանի պետականության և մշակույթի պահպանման գործում: «Առանց Կոմիտասի և Թումանյանի հայկական մշակույթը չէր ունենա այն բովանդակությունն ու զարգացման ընթացք, ինչ մենք ունենք այսօր» - նշեց դեսպանը:

Թումանյանի և Կոմիտասի կյանքի և ստեղծագործության հակիրճ նկարագիրը ներկայացրեց Սոֆիայի հայկական կազմակերպությունների համադրիչ խորհրդի անդամ Վ. Թոփակբաշյանը: ՀԲԸՄ կիրակնօրյա դպրոցի ուսուցչուհի Կարինե Գևորգյանը ընթերցեց հատվածներ Թումանյանի չափածո գործերից։

Համերգի երաժշտական մասում հնչեցին Կոմիտասի լավագույն և սիրված մեղեդիները հատուկ այս նպատակով դեսպան Սարգսյանի նախաձեռնությամբ և անմիջական մասնակցությամբ ստեղծված լարային քառյակի կատարմամբ:

Համերգն ունեցավ մեծ հաջողություն՝ արժանանալով հանդիսատեսի ջերմ ընդունելությանը:

Միջոցառման ավարտին դեսպան Սարգսյանը դեսպանության շնորհակալագրերով պարգևատրեց դեկտեմբերի 1-ին Սոֆիայի ամենամյա բարեգործական տոնավաճառին անմիջական և ակտիվ մասնակցություն ցուցաբերած հայ համայնքի շուրջ մեկ տասնյակ ներկայացուցիչների:

Տոնական երեկոն, որի մասնակիցները դարձան Սոֆիայի հայ համայնքի բազմաթիվ ներկայացուցիչներ, մշակույթի հայ և բուլղար գործիչներ, ՀՀ դեսպանության անձնակազմը, եզրափակվեց ամանորյա հյուրասիրությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր