Դեսպան Եդիգարյանը մասնակցել է Գասպար Բեշերյանին նվիրված հուշատախտակի բացման արարողությանը

19 սեպտեմբերի, 2022

2022թ. սեպտեմբերի 17-ին Բուլղարիայում ՀՀ արտակարգ և լիազոր դեսպան Արմեն Եդիգարյանը մասնակցել է Սեպտեմվրի քաղաքի Սարանբեյ կայարանի առաջին ղեկավար, հայազգի Գասպար Բեշերյանին նվիրված հուշատախտակի բացման արարողությանը:

Իր ելույթում դեսպան Եդիգարյանը նշել է, որ Գասպար Բեշերյանի ստեղծագործ և արարող դրոշմը իր վրա կրում է ոչ միայն կայարանը, այլև Սեպտեմվրի քաղաքը:

Դեսպան Եդիգարյանն ընդգծել է, որ միջոցառման անցկացումը խորհրդանշական է՝ հաշվի առնելով Բուլղարիայի հայ համայնքի հաստատման 100-ամյակը, ինչպես նաև Հայաստանի ու Բուլղարիայի միջև դիվանագիտական հարաբերությունների հաստատման 30-ամյակը՝ ավելացնելով, որ հայ և բուլղար ժողովուրդներն ունեն բարեկամության դարավոր ավանդույթներ, որոնք հիմնված են նաև մշակութային, կրոնական և այլ ընդհանրությունների և մտերմության վրա:

Դեսպան Եդիգարյանն ընդգծել է, որ Հայաստանի ինքնիշխան տարածքի նկատմամբ Ադրբեջանի սանձազերծած ագրեսիայի հետևանքով ստեղծված իրադրության համատեքստում ևս զգալի է բուլղար հասարակության համերաշխությունն ու աջակցությունը Հայաստանի ժողովրդի հետ:

Կարևորելով հայ համայնքի՝ որպես երկու ժողովուրդների միջև յուրօրինակ կամուրջի դերակատարումը, ՀՀ դեսպանն առանձնանշել է, որ Գասպար Բեշերյանն լավագույնս է մարմնավորում հայ-բուլղարական բարեկամությունը և եղբայրությունը:

Հուշատախտակի բացման արարողությանը ներկա են եղել բուլղար պաշտոնյաներ և պետական կառավարման մարմինների ներկայացուցիչներ, այդ թվում՝ Սեպտեմվրիի քաղաքապետը, ԲՀ պետական երկաթուղիների Պլովդիվի տարածաշրջանային ղեկավարը, ինչպես նաև հայ համայնքի ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր