Հիշատակի միջոցառումներ Սոֆիայում՝ նվիրված Հայոց ցեղասպանության 108-րդ տարելիցին

25 ապրիլի, 2023

2023թ. ապրիլի 23-ին Սոֆիայի «Երևան» այգում գտնվող հայկական խաչքարի մոտ անցկացվել է հիշատակի արարողություն՝ նվիրված Հայոց ցեղասպանության 108-րդ տարելիցին:

Միջոցառմանը ելույթ ունենալով, դեսպան Արմեն Եդիգարյանը նշել է, որ փլուզվող ժամանակակից աշխարհակարգի և Ադրբեջանի՝ Հայաստանի դեմ շարունակվող սողացող ագրեսիայի համատեքստում, այնուամենայնիվ, կարևոր է արձանագրել երկու իրողություններ. այն, որ փետրվարյան ավերիչ երկրաշարժից հետո, Հայաստանը, ելնելով մարդասիրական մղումներից, իր օգնության ձեռքը մեկնեց Թուրքիայի ժողովրդին, ինչպես նաև այն, որ Հայաստանի և Թուրքիայի հատուկ ներկայացուցիչների մակարդակով երկխոսության շրջանակներում պայմանավորվածություն է ձեռք բերվել Հայաստան-Թուրքիա ցամաքային սահմանը հատելու հնարավորություն ապահովել երրորդ երկրների քաղաքացիների:

Դեսպան Եդիգարյանը նշել է, որ Ցեղասպանությունից ի վեր հայ ժողովրդի արդարացի պայքարը երբևէ ուղղված չի եղել թուրք ժողովրդի դեմ, այն ուղղված է թուրքական իշխանությունների ժխտողականության դեմ, և հավելել, որ այդ հարցում իր անգնահատելի դերն ունի Հայկական Սփյուռքը: Դեսպան Եդիգարյանը, դիմելով բուլղարահայությանը՝ կոչ է արել ավելի ակտիվ աշխատանքներ տանել Ապրիլի 24-ը որպես Հայոց ցեղասպանության հիշատակի օր, Բուլղարիայում, այդ թվում՝ Ազգային ժողովում հիշատակելու ուղղությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր